陸羽仁 金融High Tea——在泡沫中求生

中國人民銀行上周五宣佈，從9月15日開始同步調升銀行存貸利率0.27個百分點，一年期貸款利率為7.29%，存款利率為3.87%。這是央行今年的第五次加息，與上次加息只相隔了24天，創下央行加息間距最短的歷史紀錄，主要回應剛公佈內地8月通脹數字高達6.5%的過熱現象。
　　 反觀大洋彼岸的美國，聯儲局本周二將議息，外界估計將會減息0.5厘，放水救市。美國的次按風波蔓延到英國，搞到專攻按揭的銀行Northern Rock擠提，英鎊下瀉，雖然格林斯潘大唱反調，預期美國通脹明年升到4.5%（聯儲局目標通脹率只是2%），暗示聯儲局主席伯南克好難減息；但從美股杜指周五跌過百點後反彈至升17點收市，顯示減息預期極高。看來中國和美國中央銀行正在做相反的事情，一個加息，一個減息。

　　 中央銀行如國家經濟的大水喉，市場水太多時，就把水喉關細，減少放水，防止經濟過熱爆煲。市場水太少時，就把水喉開大，放水入市場，防止經濟衰退。央行加息，等如加水費，增加用水成本，就會有關細水喉的效果，中國正在做這種事。央行減息，等如減水費，用水的成本低，就有開大水喉的效果，美國亦預備這樣做。

　　中國超熱　加息效少

　　 內地通脹的壓力不是大，而是非常大，八月通脹率6.5%（單計肉價年增長49%），若以一到八月計通脹率是3.9%，通脹率高過存款利率叫做實質「負利率」，即係話存錢入銀行，計及物價上升的因素仍然係負數，存錢好蝕底，所以逼人拿錢出來投資，央行話加息是想實際利率由負轉正，但加完息後存款只有3.87%，仲未追上通脹的3.9%，若計及通脹近期猛增，全年通脹還在向上，實質負利率更甚，要加多幾次息才追得上。

　　 在中國這種急促發展的經濟，加息關水喉的力度有限，因為經濟增長快，投資市場熱，內地人只要能夠借到錢，例如去炒地皮，轉一轉手升幾成，不要說7.29厘的借貸利率，只要借到錢，20厘、30厘都願意借。所以利用加息控制過熱經濟，力度有限，唯有加息加到好過份時，才會有少少效果。又或者行番舊路，用行政手段限制銀行貸款。

　　泡沫吹大　無人再提

　　 估計今天內地股市對加息不會有太大反應，跌一天已經算畀面，隨時回一回又向上。內地股市的泡沫會愈吹愈大，不知大家有無留意，在內地股市3000幾點時，有不少人討論內地股市有無泡沫，包括量子基金創辦人羅傑斯（Jim Rogers），也講過內地股市有泡沫，惹來內地股民連番臭罵。到內地股市升穿5000點之後，大家對暴升的股市習以為常，覺得它是泡沫的人更覺得它是泡沫，但他們也知道，在暴升的股市，再講泡沫不受歡迎，所以少講兩句，大家心照。

　　 內地股市升穿4000點後，亦進入新階段，過去阿爺比較積極調控股市指數，對大股「點穴」，勸喻基金不要炒大股炒得太過份，以免指數升得太高；到最後加印花稅以圖大力制止炒風，不過那個行動幾失敗，行得太急，搞到股民衝擊財政部，令阿爺要托番起個市，自此阿爺更不敢出行政辣招管制股市，甚至不再對大股點穴，基金如猛虎出柙，狂買大股，造成指數放量上衝。由於這一轉主要炒大股而不是細股，買大股的基金最受惠，造成良性循環，吸更多錢入基金。股市升到這些階段，更不是加一點息能控制得了。股市老手預計，內地股市咁炒法，最後一係在阿爺過度調控下爆破，甚至在完全失控的高位自行爆破，爆破前還有驚人一炒。

　　 內地加息，美國減息，還有一個副作用，會令熱錢加快流入內地，在人民幣升值的預期下，兩地利息走勢背馳，熱錢流入內地，即使不去炒作，光是賺息差和賺匯價也不壞。在此種壓力下，內地應會加快搞「港股直通車」，希望透過此一渠道洩一洩洪，減輕壓力。

　　 這幾個因素加起來，會為港股帶來更多泡沫。美國減息頂住經濟，港息長線跟美息走，即使短期因銀行同業拆息高企減唔到息，但平靜下來還有減息空間，今年香港通脹有機會升至3%，減息後隨時出現負利率，會刺激資金流向股市。但內地加息後為防熱錢更快流入，要加速向香港洩洪，把泡沫輸出香港，令港股熱上加熱。

　　散戶受傷　未敢入市

　　 陸羽仁在23,000幾點時，叫大家要習慣買貴股的日子，內地股票40倍、50倍市盈率的局面，可能會在香港出現，講得兩講，港股好快就炒到近25,000點，股市熱度急升。

　　 我經常講，股市唔熱唔爆，到全部股票都狂升、散戶亂咁買股的時候，就算唔爆，都會大幅調整，這就係我所講的「散戶指數」。我以打電話畀經紀張作為其中一個指標，如果佢個電話好難打得入，而且他接到我這個貴人的電話，都不停咁接其他電話，咁就即係話散戶指數好熱，離爆煲不遠。

　　 目前雖然指數近25,000點，但係散戶仲未係好熱，主要原因係佢在上月大跌後驚魂未定，未敢追貨，見到紅籌國企係咁升，又唔敢入市，所以買貨者係偷渡來港的北水居多，而不是本地散戶資金。至於散戶至愛的三、四線細價股，雖然部份已經開始炒作，但大部份未郁，好多散戶買未走，仍然扮緊蟹，所以熱情不至太高漲。

　　 散戶好衰，股價平時無膽買，股價好貴時卻夠膽追，早前22,000點、23,000點時，你搵把槍指住散戶，佢都唔敢入市，到升至25,000點、26,000點，特別是他們愛炒的雞股都升到飛起時，散戶又變得膽生毛，飛身撲上。

　　高買高賣　享受泡沫

　　 你可能唔係好明白，點解我成日話「散戶唔癲，股市唔爆」，你要知道股市交易係有對手的，沒有對手沒有成交，那些只是帳面財富。外資大戶在炒作大市，最後不是炒高讓帳面身家上升，開心一下，而是要把手上的貨清掉，反手做埋淡，才有實質利潤入袋。若大市不狂升，泡沫唔夠多，大戶倉位咁大，搵鬼接貨？無人接貨，佢炒高後股市跌番落來，只會得個桔，所以佢會炒到好熱，炒到股市雞犬皆升，炒到大家無防備心，炒到最頑固的投資者都入市，就差唔多要跌，因為大戶已引到對手入場，引到散戶高位接佢沽出的股票和期指，呢行為叫做「派貨」，大戶派夠貨，只要佢用手指尾推一推，個市就會應聲倒地。

　　 在美國減息，內地加息，外國熱錢流入中國，內地要推錢到香港的大環境下，會造就香港股市的大泡沫，隨時升到你唔信，1973年港股1月時只有900點，到兩個月之後，同年3月已升到1700點，兩個月升近一倍，股市要爆之前，會先來一個喪升，升得愈喪，爆得愈大。如果唔係咁升到咁喪，下跌或許只是調整，仍然是大戶製造的波浪。但升得好喪時，跌幅就會好驚人。

　　 無論如何，在泡沫市中求生有一套方法，有貨者首先就不要太快清貨，清貨太快，就難忍誘惑再入市。我有個朋友97年7月清貨離場，到9月「見個市無事忍唔住入番市」，這就是太早離場的噩夢，所以有貨者見大市不斷創新高，不妨坐貨，真係想沽，就定一個止賺位，例如現價低10%，不到不沽，股份再上，就不斷推高止賺位，食盡升幅。

　　 若無貨或貨少者，在近25,000點的大市，已經唔易搵到平價的好股，可作長線投資，買股多數要以「投機的我」心態去看待，不要下下話自己係「投資的我」，想長線，以港交所（388）為例，現價187元，現時每天都有近1000億成交，港交所明年預測市盈率都近40倍，炒到一鑊泡，若大市跌番到300、400億成交，你估港交所值幾多錢，我唔係叫大家唔買股，而係話俾大家聽，依家係炒股，高買高賣，享受泡沫。

陸羽仁 金融High Tea——海嘯前夕 大海執金

港股在上周五唔係點跌得落，恒指收23,982點，微跌67點。不過美國周五公佈就業數據非常唔靚仔，上月職位減少4000個，和市場預期增加10萬個相差很遠，是2003年以來首次職位下跌，消息一出，美股大跌，杜指急挫250點收場，市場開始憂慮次按風波令美國經濟衰退，經濟差令減息預期大增，兩年期美國國庫債券息率跌到2005年以來的低水平。美國就業數據差令美元進一步走弱，兌日圓曾見113，黃金曾見703美元。
　　 上星期次按餘波已有山雨欲來之勢，令歐美銀根抽緊，銀行同業拆息扯高，連帶把香港的拆息也抽高，對股市本有壓力。市場大戶話，外資想沽，製造較深的調整，但偷渡來港的北水卻一直買貨，大市沽極都沽唔落，你睇上周五無重大消息影響股市，都有1091億成交，就知道買賣雙方有對手。今浪美股急跌，唔知可唔可以插番低港股矣。

　　 美國為全球送上的次按危機，源於美國樓市下跌，今次不是狼來了，是真跌，所以正確認識美國樓市危機的性質，絕對有助我們部署未來一年的投資策略。

　　 有一個熟悉環球樓市的猛人，以海嘯前夕來形容美國的樓市，他說現時好似那次南亞海嘯那樣，巨浪湧來之前，海水不是上漲，反而係後退，海水退到離海岸線好遠的地方，海外露，平日見唔到的水底生物都見到晒，魚呀、蜆呀、蟹呀，到處都有，所以引到好多人跑落海執魚，不知道海水急促退潮後，跟海嘯就殺到，大水淹沒整個城市。

　　金融地產急裁員

　　 美國樓價如今是自1929年大蕭條以來，首次各州全線下跌，以前的跌市只係東西兩岸炒得勁的地方跌，不會全線跌。猛人話，有些豪宅比高位跌一半，仍然無人問津，樓市又好，股市又好，價錢回調，平貨湧現，就好似大海嘯前水退露出的魚蝦蟹一樣，引人去執。

　　 美國樓市唔掂，次按爆煲，美國的房地產業和金融業已提早進入寒冬，好多相關公司內部按動警報器，開展「盈利保障計劃」，講得白，即係能節省就節省，提早部署應付嚴冬，走人唔請番，未使的錢盡量唔使，原本要飛去開的環球商務會議由電話會議取代，總之預計未來收入有好大問題，要大力節省開支填數。至於投資銀行就更大鑊，第二季盈利數字仍然好靚，遲少少10月以後公佈的第三季數字就會急跌，投資銀行炒人潮又殺到埋身，華爾街已經感覺到熱度。

　　 在這環境下，美國就業職位急跌好正常，衝擊波擴散開去，消費亦受影響，美國唔應該再擔心通脹，要擔心的反而係通縮，在這環境下，聯儲局主席伯南克都無乜選擇，唯有減息，而且不是減一次，係要接連減幾次才可以頂得。

　　黃金進入上升周期

　　 美國經濟走弱，不能不減息的大局，是美元轉弱的雙重誘因，市場睇通睇透，上星期尾匯市和金市已經大亂，美元兌主要貨幣急跌，美匯指標（US Dollar Index，美元兌主要貨幣的綜合指標）跌到三十年的低位，跌穿80（見附圖），美元已到三十年最弱的歷史低位，由85年高峰的160樓上，到現時谷底的80，而且還作勢穿位向下。

　　 黃金就起勢咁升，在上周五美國市升穿700美元，一周之內差不多升了40美元，黃金抽上，觸發了斬倉盤，升勢更急。黃金是無息貨幣，市場不信美元，但歐洲亦受次按影響，日本經濟亦唔太好，歐羅、日圓都買唔過，資金急促轉移至黃金，若美元減息後再走弱，黃金回完氣仲有得升。　

　　 講番美國，早前格林斯潘話美國經濟有三分一機會衰退，暗示美國要減息，當時現任聯儲局主席伯南克不以為然，話美國經濟無事，等如話不用減息。如今美國樓市和次按係咁爆，伯仔已經被格老睇死，焗住要減息。美國樓市如今的病變，主要由格老一手造成，他在9‧11後連續減息，減到聯邦基金利厘僅得1厘，不但浮起災難後的美國經濟，還谷起一個大泡泡，樓市炒到飛起。然後格老加息17次，共加了4.25厘，令聯邦基金利率回到5.25厘，之前低息時買樓者就開始要捱貴息，而且美國按揭好多是起初低息，2、3年後才跟番市場利息，所以按揭炸彈就慢慢爆發。

　　 格老任內美國經濟盡享泡沫繁榮，他自己贏盡掌聲，離任前把利息加上高位，等如把將爆未爆的炸彈交給伯南克，人地佈好個局，連叫你減息那句都講埋出街，伯南克就好似傻瓜一樣，步步被人睇死。

　　 陸羽仁和中環茶友研究減息有無效，大都認為減息有少少紓緩作用，但不能根本解決問題。9月18日伯南克減息，或者0.25厘都唔夠，一減要減0.5厘，而且一次唔夠，還可再減。環球金融市場眼前問題是信貸緊縮，主要是信心問題，金融機構有錢都唔敢借出去，銀行同業拆息立即扯高，聯儲局大力減息兼放水，擺出大力放鬆銀根的姿態，有助紓緩信心危機。不過美國樓市的大鑊，似乎好難搞得掂，猛人就估，聯儲局減減息，美國樓市或許會定一定，幾個月後又會反覆下跌，海嘯要來，好難阻得了。

　　中小銀行蝕息差

　　 讀者面對這種大海嘯，是否要立即清貨離場呢？似乎未必，金融市場這種海嘯前退潮有金執的局面，或許可以維持三幾個月，你太心急清貨，「不幸地」遲股市在減息聲中抽高，你又會好心，要走都用定止賺位的方法，例如唔跌穿22,000點唔離場。

　　 但你亦要明白，美國樓市和次按危機，隨時還有海嘯在後頭，可能在今年底或明年初又殺到（如果唔係更早殺到的話），所以你行落去執金，記住抬高頭望住前面，睇個幾層樓的大浪幾時到。如今港股面對好怪的局面，美國次按問題利淡，北水自由行利好，所以短線等大市回吐後，還可看高一線。但中線就唔好咁睇好，千祈唔好信美國唔掂中國無事的分析，因為美國若因樓市回落陷入衰退，中國出口都會好大鑊，中國內需市場暫時未係好成熟，經濟仍需出口帶動，美國出事後，第二波就會衝到中國經濟。這種市況已不像過去兩年的長升市，合埋眼買股都可以發達，這是狂升暴跌的股市，升時升到你唔信，跌起上也會好嚇人。

　　 微觀去看，買股也要趨吉避凶。美元弱勢已成，中線都唔睇好，美國經濟好還可以炒油股，經濟唔好只有金股可以炒（或者直接買金），等金價回番到670美元左右，又係吸納時機。金融市場波動，銀行股不太好景，聽銀行業巨子講，本地銀行中，只有豐和恒生有錢，其餘中型、小型銀行都缺水，要在銀行同業市場拆借，近日拆息咁高，這些銀行貸款息口低過自己拆借的利息，要蝕息差，所以中小型銀行都會較弱。如果銀行頂唔順要加息，咁樣地產股都會中埋招，小心小心。

　　網誌論港交所變官股

　　 最後一提，是港府上周五斥資24億買入1572萬股港交所，成本價155.4元，大手買盤搞到港交所單日狂升10元，升上158元高位收市。8月17日港股尋底日，港交所曾見100元，股民當日無買，如今見半個月升近6成，大呼走寶。政府入股的目標其實係政治性，想防範港交所不要被外資收購，否則好難同內地交易所合作，港府唔係有內幕消息，覺得港交所好抵去追貨。陸羽仁寫了一篇網誌詳釋港府入市因由，有興趣可以上頭條網一看。

股神夢

股神夢 <一>

我既股神夢係由我打第一份工開始, 果時剛剛我打工果間公司就搞上市, 有個上司就走過黎同我講, 話公司可以比我通過內部認購返一手, 問我有冇興趣, 如果冇, 不如用$2,000賣左個認購權比佢, 果時我完全唔知股票係咩野, 只係係電視睇過”大時代”既方展博對住交易所大叫升, 升, 升咁就發左, 見咩都唔洗做就搵到$2,000, 當然第一時間賣左佢, 這是我人生第一次利用股票賺到錢, 當時我覺得幾開心. (後來當然發現自己比人昆左,果個pk上司原來同唔少同事買左認購權, 上市後一手最少都執左一萬銀)

自此之後, 我見炒股票仲好過打工, 加上自己學歷低, 經驗少, 打工就實永冇前途, 希望自己有朝一日可以成為股市中一條大鱷.(點知最後都係做左點心至真) 於是就日日去書局搵d投資書籍日睇夜睇, 由如何投資股票睇到西人寫既投資書籍都唔放過, 最後仲番夜校學埋會計, 等我可以識睇上市公司年報.(不過好幸運地發現學左會計, 原來對我投資成績一d用處都冇, 反而對我之後創業極有幫助)

之後幾年, 我仍然一路打工一路炒股, 投資成績有嬴有輸, 但投資經驗都比初期好左好多. 有一次,看過美國股神畢非德既自傳 Buffett: The Making of an American Capitalist, 當時佢老人家係香港都未係好hit, 睇到佢原來係廿幾歲就自己開投資公司, 首先叫家人支持自己, 之後投資開始見成績, 就慢慢收其他客, 直至佢老人家解散佢間投資公司, 佢已經係億萬富翁, 果時佢都只不過係三十幾歲. 就係咁就出事, 對當時我這位全身都係熱血既青年完全視佢老人家為畢生偶像, 立志要學佢咁開投資公司, 之後開班授徒, 成為股神. 加上當時又比我符符碌碌係幾次炒作中, 又搵到多少, 令我對投資技巧既自信心強化唔少, 這時就係種下我決定之後全職炒股既仆街之路既開始. (所以其實好多時d偉人自傳, 真係害q死唔少後生仔)

股神夢 <二>
今日係信報睇到錢志健講到心雄比貪心更難處理, 真係講得好岩, 想當年全職炒股會仆街正正就係死係這種心態. 我既腦袋又諗起當時有幾仆街…..

係受到股神既自傳無意中鼓勵下, 我當然要計畫點樣係股市搵大錢既夢想. (如果畢佬知道有條傻仔, 因為睇到佢本自傳就走去全職炒股, 相信一定會心諗”死傻仔, 自傳既野都好信, 如果唔係有個證券分析之父做我師父, 我讀書果時免費走去同佢做打雜跟佢學野, 順手識埋佢d客, 加上我屋企有d家底支持下我, 你估我間投資公司邊有開得咁順利, 當然最重要係我係投資天才先至可以做到股神, 你睇下我班同門師兄弟, 最掂果個鄧佬, 身家都重差我幾皮, 就知我有幾勁, 你個死傻仔唔好發夢, 想學我”)

當時我打工收入都得果幾千銀一個月, 這幾年有時好運上黎, 一個月既炒股收入仲多過打工, 加上覺得當時返工既際遇真係麻麻地, (緊係麻麻地, 果時我份份工都係交左差就算數, 邊有運行) 同上司關係又唔係咁好, 就心諗不如唔好做, 全職炒股, 但問題係炒股最重要有資本, 雖然我累積到少少資本, 但都唔係好多, 於是我做左一件好仆街同埋令我之後好後悔既事, 就係問我屋企人借股本. (大家都可以想像得到, 之後有幾大獲) 結果加加埋都有幾十萬就開始左我既仆街之路.

我辭工既時候正好係 1998 年…..

股神夢 <三>
辭工後, 開始左我既仆街之路, 其實全職炒股既日子真係好 free, 根本同退休冇咩分別.

試想想當時我一日就係咁樣過, 朝早8點幾起身, 食早餐, 睇報紙, 之後上網睇新聞, 開即時報價等開市, 留意股市走勢, 上午收市. 食完 lunch , 下午開市後, 就係度對住部電腦發呆, 睇住d跳來跳去既股價直到收市. 四點幾見有時間就走去圖書館睇上市公司年報, (當時d年報都仲未可以係網上睇, 上網真係最偉大既發明) 睇到差唔多就返屋企. 比起之前返工簡直係天堂與地獄, 全程冇人理你做咩, 冇你覺得討厭既上司係度管住曬, 對當時既我係要咁free既人生先覺得有意義. (最後我回想咁既生活同做個廢人都冇咩分別, 人生時間有限, 其實可以做更加多有意義既事, 特別係我之後明白股市玩既都只不過係財富轉移既遊戲, 當然這只不過係我既個人想法.)

在最初開始全職炒股, 我既投資組合 (投機??) 係以二線股為主, 當時我這投資手法好大程度係參考自 The Intelligent Investor by Benjamin Graham (即股神師父) 與及當時從史威德(即林行止先生另一筆名)既書中介紹到英國經濟學家凱恩斯係投資上既生平, 其put all eggs on one basket 既手法令我把投資組合集中在少數股票身上, 只不過由幾隻股票組成. 當時我正處於98年上半年, 其實當時有唔少二線股跌到好低既價錢, 好多股票都從低價買入. (不過係政府入市前,原來低處未算低)

人一生中有三種心態係最容易出事, 一係心雄, 二係心急, 三係空閒. 係我全職炒股既日子就正正有齊曬這三種心態. 如是者過了幾個月, 我見我既投資組合所賺的利潤唔係好多, 加上這些日子沒返工收入, 日常支出都一樣要照比, 好彩當時我冇女朋友, 加上又可以食屋企, 都仲可以頂得住, 不過少數怕長計, 我就開始覺得利用股票賺錢好慢, 以我既本事有咩可能仲未發達, (真係有咩人唔係咁諗)就開始研究點炒恆指期貨.

不過在研究過後, 發現玩期指風險太大, 怕出事既時候, 自己會好大獲. (雖然我好貪心, 但都有小心既一面) 但如果玩恆指期權就風險細好多, 最多都係輸曬d期權金, (就係咁諗就出事) 於是我把我投資組合中有利潤既股票沽出, 套現約20%本錢, 準備轉到炒恆指期權. (好明顯大家都會估到, 最終我係仆街係恆指期權手上)

當時我睇住恆指由11,000點係咁跌到9,000點…

股神夢 <四>
係未講我點仆街法, 我想講下睇投資書既經驗.

因為全職炒股既關係, 我平時都好得閑, 一有時間就睇書. 我曾經睇過唔少關於大炒家既理論及自傳, 其中有一本書, 我好鬼印象深刻. 就是索羅斯果本大作 The Alchemy of Finance, 本野係我睇過咁多本既投資理論書, 唯一一本係我點睇都係一知半解既投資書, 佢老哥講既反射理論有如金庸小說中既倒練九陰真經一樣, 唔係普通人可以睇得明. 果段期間我真係花左唔少時間去讀, 仲讀到差d走火入魔, 唔怪之d人話讀哲學既人唔係天才就係白痴. (當然可能有其他人可以係其中悟出絕世奇功)

另外有一本奇書叫做 Reminiscences of a stock operator by Edwin Lefevre, 係講述一百年前大炒家 Jesse Livermore 既炒股事績. 我大部份投機炒股既方法都係從這本奇書身上學到. 誠意推介比各位希望係股市有一番作為既朋友, 絕對係縱橫股市, 必備良書. 當時本書日日比我睇到差唔多爛, 其中所講既炒股實戰理論, 直到現在我仍記在心中. 特別有一段講佢做左少年股神都唔夠一年, 就炒棉花輸q曬d錢, 結果仲欠人周身債, 之後足足衰左幾年, 最後又比佢炒股翻到身, 其中講佢既經歷同心態上既轉變, 我宜家都仍然記憶猶新.

講完投資書, 係時候講番我條仆街之路.

上帝要你仆街, 必先令你瘋狂. 自從我決定炒恆指期權後, 就日日留意住恆指既走勢, 我唔知係好運定係行衰運, 當時香港就咁岩遇上金融風暴, 恆指就由11,000點係咁跌, 我就一直係度諗點炒好. 首先我認為當時恆指大方向既走勢一定係跌, 我就係約9,000點開始買恆指put期權, 結果唔洗幾日, 我就賺到等於我之前返工超過一年工資既金額, 可以想像得到當時我係有幾 high, 心諗以前同人打工果時, 做到成隻狗咁, 仲要日日比人問候, 一個月都係得果幾千銀, 宜家只係一日就搵到相對之前一年既人工, 比我炒多幾個月, 容咩易做到千萬富翁. (直到現在我都唔想承認當時既我係short左)

之後就由9,000點一路買put買到7,000點, 越係賺到錢, 越係心雄越係瘋狂, 我見炒股票都冇炒期權咁好搵, 再把股票組合中, 再沽出大約一半股票出黎, (多年後回想,沽出當時手上股票投資組合這決定,可列入我人生十大白痴行為之首, 點解? 之後再解釋) 其中資金轉去炒期權. 當恆指跌破7,000點既時候, 雖然我已經 high到傻左, 但仍然有些少理智, 我好似好聰明咁認為恆指一定會反彈, 結果我係恆指6,800點時, 反手轉買恆指 call 期權, 雖然之後恆指下跌到6,600點, 我都冇沽出手上 call 期權, 仍然一路keep住買call 期權, 結果恆指真係反彈到7,200點, 我賣清手上 call 期權, 又再度故技重施反手買 put 期權, 仲要係好大手咁買, 心諗如果搞掂埋哩次就發達.

但當日股市收市後, 突然間係電視機睇到話有特別廣播, 有三條友口黑面黑, 好似比人殺左老豆咁走出黎開記者招待會…..

這時是我仆街既開始….

股神夢 <五>

當我係電視機見到未來特首係度話, 宜家官府決定入市打大鱷, 當時第一時間心諗:” 仆街 !! 點解官府會入市 ??? 冇可能 !! 香港唔係一直都實行積極不干預政策, 教科書都係咁講, 唔通索攞絲條靚好串咁係電視話聯匯一定會脫勾, 搞到官府要入市, 頂 !! 我仲大手買 put 期權, 點算好 ?? 今次真係殺錯良民 ”

(事後為左這個”教訓”, 我唔想自己死得不明不白, 我追查當時官府入市既資料, 除左發現官府果邊有高人指點外, 如果唔係都唔會入市時機計得咁準, 還有就係發現所有有份幫官府入貨既大行, 一早就收到風, 既然大行都可以收到, 當然索攞絲等大鱷都收到, 當我係6,600點買 call 期權仲以為自己好醒果時, 點知原來各大鱷已經著手平淡倉, 同埋準備反手做好倉, 就係咁樣, 我先買中… 最後發現原來咩反射理論都係假, 收風快先至係王道, 唉! 等我之前仲係咁買佢咁多書返黎睇, 真係浪費金錢)

係官府入市第一日, 我係屋企部電腦睇到百年難得一見既情況, 好有”大時代” feel, 所有藍籌股既買盤都係守係一個價位, 當時我既心情好複雜, 我好開心能夠睇到咁壯觀既場面, 但入場費對我黎講真係好貴, 唔單只好貴, 係好x貴, 係以我所有 put 期權都變成廢紙做代價. 我用左一個月時間炒期權賺番黎所有錢, 結果係一日就輸番曬落去, 仲要連本金都輸左兩成. (回想如果當時我唔係咁黑仔, 果次係比我嬴左既話, 我相信以我少年輕狂既性格, 係之後一定好有可能會破產收場, 這場挫折可能係不幸中之大幸.)

雖然當時我遇上大挫敗, 但我都未灰心, 仍然希望可以利用餘下既資金, 賺番之前所失去既錢, 咁就埋下我把餘下資本都輸埋既伏線. 係投資(投機 ?)上, 其實好講”平常心”這東西, 平常心係對所有事物既分析力既本源. 當一個賭徒係賭場輸左大錢之後, 通常都會希望能夠利用餘下既錢去嬴番之前所失去既錢, 結果就只有把連手上少少既錢都輸埋, 因為佢已經失去平常心, 佢只係用一個不切實際既願望去主宰佢既行動, 而唔係用理性既態度去主宰佢既行動. 其實大炒家 Jesse livermore 係佢本奇書, 都提過這種心理壯態, 佢自己都試過好幾次係咁既心理壯態下輸大錢, 當時我日讀夜讀佢本書, 雖然明白這道理, 但係臨場既時候都係一樣控制唔到我自己, 可見要投資發達唔係一件容易既事. (當然有其他大炒家睇到我咁寫, 就會心諗係你廢姐, 又唔見我係咁, 死傻仔)

幾個月後, 失去平常心既我, 結果….

股神夢醒

在官府入市之後幾個月內, 我仍死心不惜希望可以把輸左既錢嬴番黎, 結果我把手上股票投資組合不斷地沽出 (本來我最初原意是長線投資), 把資金轉到去炒恆指期權. 結果好快咁係幾次估錯恆指方向下, 輸到得番本金約四成. 到左果陣, 我開始覺得驚, 原因唔係因為炒賣輸錢覺得驚, 我當時好天真咁覺得這些錢輸左, 咪當買個經驗, 我仲有一日一定可以搵得番, (之後實情係我衰左好耐, 先等到果一日, 當時我完全唔明白有些機會冇左, 就真係可以一世都搵唔番, 所以宜家我做生意時, 好珍惜所有賺錢既機會) 但我宜家輸既錢大部份都係同屋企人借, 這一點令我覺得好後悔, 唔知點面對屋企人.

結果有一日, 我既心情好 down 咁同我老豆講炒期權輸錢這單野.點知我老豆用家長式口吻同我講 : “衰仔, 一早知你會死硬, 年少氣盛, 以為自己識少少就好醒, 係我借錢比你果日, 就知你會有今日” 當我聽完我老豆咁講, 即場謝曬, 不過我老豆見我死曬狗個樣, 就唔忍心地安慰我 :”算拉! 衰仔, d錢輸左當買個教訓, 下次醒目d” 果刻我完全感受到父愛既偉大, 我好感激上天安排一個咁好既老豆比我.

既然全職炒股衰左, 就只有面對現實. 當時我就把手上餘下股票係有少少利潤情況下沽出, 先把錢還比屋企, 但都係唔夠, 之後再諗辦法一路路還返比屋企. 但當時其實我都迷茫, 如果我唔炒股票, 就好似咩都唔識, 自己都唔知可以做d咩野好, 返出去打工又好似係死路一條. 直至當時有一日, 買左隻”華爾街”既vcd番屋企睇, 這套野真係好精彩, 完全反映拍出金融界既真實既一面, 特別係 Michael Douglas 飾演大炒家 Gordon Gekko , 除左佢果句金句 Greed is good 外, 佢有一段對白令我完全改變我之前對股票市場既睇法.

Gekko: The richest one percent of this country owns half our country’s wealth, five trillion dollars. One third of that comes from hard work, two thirds comes from inheritance, interest on interest accumulating to widows and idiot sons and what I do, stock and real estate speculation. It’s bullshit. You got ninety percent of the American public out there with little or no net worth. I create nothing. I own.

這段對白令我明白原來股票市場只不過是一處被人利用把財富轉移既地方, 本身這地方是完全不存在任何創造價值. 當我明白這道理後, 開始諗炒股票係咪可以成為終身職業 ? 連大炒家 Jesse Livermore 都炒到最後要吞槍自殺, 我係咪都要步佢後塵 ? 最後我醒悟到炒股票真係過唔到世, 開始想做生意. 當時我諗住做生意, 最重要係推銷, 於是我去搵左一份 sales 既工去 train 自己, 就開始左我另一段生涯.

股神夢完.

馬後砲
有一件事其實我一直都冇同任何朋友講, 原來要係股票市場發達係好容易, 宜家我馬後砲講講, 八年前我全職炒股時所買既股票投資組合, 今日我透露其中一隻我當時本來打算長線持有既股票, 佢姓建名滔化工, 果時我從佢份年報睇到間公司果幾年不斷投資開廠, 當時我認為這隻股票股價兩年內一定會大幅上升, 係1.3-1.4入左15萬股, 結果持有到我決定不再全職炒股, 就賣清佢, d錢還番比屋企. 如果當時我唔係炒期權, 而係咩都唔做直到現在, 咁我就發達. 原來 buy and hold 真係可以發達. (不過宜家諗番起個心情, 就好似唔見左張中左六合彩頭獎既飛一樣, 好X心痛)

我公開這個經驗係咪令好多人會改變對炒股既想法 ?

中國交通建設 1800 中期業績

中國交通建設(1800.HK)上半年各項業務表現理想, 帶動純利急升1.53倍, 達到27.44億人民幣。
該公司表示, 上半年各業務繼續保持快速增長勢頭, 各項指標均創歷史新高, 完成收入586.74億人民幣, 按年增長24.5%, 營業利潤急升95.6%, 至49.68億人民幣。
上半年基建建設業務完成收入392.63億人民幣, 增長36.1%, 新簽合同額為711.27億人民幣, 增長68.1%; 截至6月底止, 基建建設業務未完成合同額為1,265億人民幣。
該業務毛利率由去年同期6.8%上升至7.9%, 營業利潤急升1.71倍, 達到16.89億人民幣。
港口機械製造業務期內亦表現理想, 收入及營業利潤分別增長12.9%及1.04倍, 至102.06億人民幣及20.53億人民幣, 毛利率由14.5%微升至14.6%。
至於基建設計業務及疏浚業務收入分別增長20.1%及22.4%, 營業利潤增至4.14億及7.54億人民幣, 而基建設計業務上半年毛利由30.6%降至28.0%。
該公司表示, 相信下半年中國經濟將繼續保持快速增長, 同時持續帶動交通基礎設施的需求, 國際工程承包市場進入新一輪建設高峰, 市場潛力巨大, 該公司力爭全面超額完成經營目標。